هلمند کې د یو روغتیایي کلېنیک له رغنیزو چارو څارنه وشوه
۱۴۴۵/۰۷/۱۶
هلمند کې د کور او ښار جوړولو محترم رئیس مولوي سید نېک محمد معتصم وایي، له خپل مسلکي ټیم سره یې په ګډه د دغه ولایت په سنګین ولسوالۍ کې د یو روغتیایي کلېنیک له رغنیزو چارو څارنه وکړه.
مولوي سید نېک محمد معتصم وایي، د همدې ولایت په نهر سراج ولسوالۍ کې یې د ولسوالۍ له اداري تعمیر له رغنیزو چارو هم څارنه وکړه.
د معلوماتو له مخې، د هلمند په سنګین ولسوالۍ کې روغتیایی کلېنیک د ملګرو ملتونو د (یو، این، ایچ، سي، آر) څانګې په مالي ملاتړ جوړېږي، چې د کیفیت او چارو چټکتیا په موخه یې اړوندو مسؤلینو ته لازمې لارښوونې وشوې.
د ښاغلي معتصم په خبره، د هلمند ولایت په نهرسراج ولسوالۍ کې د ولسوالۍ د اداري تعمیر لګښت بیا د ا.ا.ا د کورنیو چارو محترم وزارت له لوري ورکول کېږي، چې رغنیزې چارې یې تر یو بریده رسېدلي هم دي.
د کور او ښار جوړولو وزارت په مرکز او ولایتونو کې له رغنیزو پروژو د کیفیت او معیار خوندیتوب په موخه څارنه کوي او د اړتیا په مهال مسؤلینو او قراردادي شرکتونو ته لازمې لارښوونې او سپارښتنې کوي.
