محترم مولوي حمدالله نعماني د ښارجوړولو او ځمکو وزارت سرپرست په توګه ور وپېژندل شو
محترم مولوي حمدالله نعماني د عاليقدر امیرالمومنين ملاهبت الله اخندزاده د ۱۹/۶/۱۴۴۳ هـ، ق نېټې د ۲۳ ګڼې فرمان له مخې، د چارو ادارې يو شمېر مسولینو او د اسلامي امارت لوړ پوړو چارواکو په حضور کې د ښارجوړولو او ځمکو وزارت سرپرست په توګه معرفي او په خپل کار یې پيل وکړ.
د ښارجوړولو او ځمکو وزارت سرپرست محترم مولوي حمدالله نعماني، لومړی د اميرالمومنين او اسلامي امارت له مشرانو پر هغه له اعتماد مننه وکړه او د لوی څښتن تعالی له دربار څخه یې خلکو ته د خدمت رسولو توفیق غوښتنه وکړه.
محترم مولوي نعماني، د ښارجوړولو او ځمکو وزارت مالي او اداري معین او پخواني سرپرست الحاج غلام غوث ناصري له چارو قدرداني وکړه او وې ويل د دې وزارت کارکوونکو او کدرونو په همکارۍ به شته ستونزې حل کړي. نوموړي ټینګار وکړ چې خلکو ته به د کاري فرصتونو زمينه مساعده او د هېواد په اقتصادي وده کې به فعاله ونډه واخلي.
د ښارجوړولو او ځمکو سرپرست وزیر همداراز د دې وزارت له کدرونو، مسولینو او کارکوونکو وغوښتل چې خپلې چارې په پوره صداقت پرمخ یوسي.
د ويلو ده چې محترم مولوي حمدالله نعماني تر دې وړاندې په لوړو زده کړو وزارت کې او همدراز د ښاروالۍ د معین په توګه دنده ترسره کړې ده
