لغمان ولایت کې د مهاجرینو د ښارګوټي پرانسته وشوه
۱۴۴۷/۶/۹
د کور او ښار جوړولو وزارت محترم وزیر الحاج مولوي نجیب الله حیات حقاني، په لغمان ولایت کې د مهاجرینو د ښارګوټي د پرانستې په مراسمو کې ګډون وکړ.
محترم مولوي نجیب الله حیات حقاني په خپلو لاسونو یو شمېر مهاجرو اړمنو کورنیو ته د نمرو د وېش لومړي سندونه هم ووېشل.
دغه راز، ښاغلي وزیر د یاد ولایت د مهاجرینو د ښارګوټي تفصیلي پلان منظور او د تطبیق لپاره مقابل لوري ته وسپاره.
له ګاونډیو هېوادونو راستنې شوې اړمنې کورنۍ خوښې دي چې د ا.ا.ا له لوري ورته د کور او ښار جوړولو وزارت په مشرۍ د اسکان دایمي کمېټې نمرې ووېشلې.
د کور او ښار جوړولو وزارت د یاد ښارګوټي تفصیلي پلان بشپړ او د پلي کېدا په پار تر لاسلیک کېدو وروسته د لغمان ولایت د کور او ښار جوړولو محترم رئیس مولوي حسین احمد تېلوي ته تسلیم کړ.
یاد پلان د کافر ګله سیمې لپاره جوړ شوی چې په (1050) جریبه ځمکه کې به تطبیق شي چې (882) استوګنیزې نمرې لري او د ژوند نورو اسانتیاوو ته هم بشپړه پاملرنه شوې ده.
د یاد پلان د تطبیق چارې په خپله د کور او ښار جوړولو وزارت کوي، چې ورسره به لارې او کوڅې، سړکونه، د څښاک اوبه او نور ټولګټي موارد د ا.ا.ا په داخلي بودیجه عملي شي.
