سرپل ولایت کې د پراختیایي سړکونو د پلان او طرحې په تړاو خبرې وشوې

1/9/1446

سرپل ولایت کې د کور او ښار جوړولو ریاست محترم رئیس داملا محمد نور نوراني وایي، سرپل ښار کې د ماسټر پلان مطابق د سړکونو پرانستلو او د نوو سړکونو جوړولو په تړاو د طرحې او پلان پر جوړولو خبرې وشوې.

ښاغلي داملا نوراني وویل، موخه دا وه چې، په سرپل ولایت کې (۳۰) متره او (۴۰) متره سړکونه جوړ شي او ښار ته لازمه پراختیا ورکړل شي.

نوموړی وایي، د سړکونو پرانستلو او جوړولو په تړاو ناسته کې، د دغه ولایت د محترم مقام استازي، د کرنې او مالدارۍ محترم ریاست، د ټولګټو چارو محترم ریاست، د علماؤ شورا، امربالمعروف، او د امنیه قوماندانۍ محترمو استازو برخه اخیستې وه.

داملا وایي، په ناسته کې ټولو اړخونو خپل نظرونه وړاندې کړل، تر څو ښار منظمه انډولیزه پراختیا پیدا کړي، خلکو ته د تګ راتګ لارو کې اسانتیاوې برابرې شي او چارې چټکې شي.

سرپل ولایت کې د کور او ښار جوړولو ریاست د یادې چارې په ترسره کولو کې د ټولو اړوندو ادارو او د ولایت محترم مقام د بشپړې همکارۍ غوښتنه وکړه تر څو چارې په خپل وخت سرته ورسېږي.