د کور او ښار جوړولو وزیر په ننګرهار کې د مهاجرینو د ښارګوټو د چارو د سمون لپاره له مسؤلینو سره وکتل
۱۴۴۷/۱۱/۱۷
د کور او ښار جوړولو وزارت محترم وزیر، الحاج مولوي نجیب الله حیات حقاني، ختیځ زون ته د خپل رسمي سفر په ترڅ کې د ننګرهار ولایت د اړوندو ادارو له مسؤلینو سره د مهاجرینو د ښارګوټو د چارو د ښه تنظیم، پرمختګ او اغېزمن مدیریت په موخه ناسته ترسره کړه.
په دې ناسته کې د یادو ښارګوټو د اوسني وضعیت، شته ستونزو او راتلونکو پلانونو او د نمرو د ویش په اړه هر اړخیز بحث وشو.
محترم وزیر د همغږۍ پر پیاوړتیا، د چارو پر چټکتیا او د معیاري خدمتونو پر وړاندې کولو ټینګار وکړ او اړوندو ادارو ته یې لازمې لارښوونې او سپارښتنې وکړې، څو د مهاجرینو لپاره د استوګنې ښارګوټو چارې په منظم، معیاري او اغېزمن ډول پر مخ ولاړې شي.
ښاغلي حقاني همداراز وویل چې وزارت ژمن دی څو د مهاجرینو د بېرته راستنېدو او مېشتېدو بهیر ته اسانتیاوې برابرې کړي او په دې برخه کې به له ټولو اړوندو ادارو سره ګډه همکاري نوره هم پراخه کړي.
د کور او ښار جوړولو وزارت په هېواد کې د ښاري پراختیا، معیاري استوګنې او بنسټیزو اسانتیاوو د رامنځته کولو په برخه کې مهم مسوولیت لري. د مهاجرینو د راستنېدو له زیاتېدو سره، د ښارګوټو جوړول او مدیریت د دې وزارت له مهمو لومړیتوبونو څخه شمېرل کېږي، تر څو راستنېدونکو ته مناسب، خوندي او باکیفیته د استوګنې چاپېریال برابر شي.
