د کور او ښار جوړولو وزیر د شهر نو ښارګوټي موجوده فزیکي وضعیت ولید
۱۴۴۶/۰۲/۲۰
د کور او ښار جوړولو وزارت محترم سرپرست وزیر الحاج شیخ حمدالله نعماني په مشرۍ له کابل تللي هیئت د بلخ ولایت په (۱۲) مه ناحیه کې د شهرنو هستوګنیز ښارګوټي موجوده فزیکي وضعیت له نژدې ولید.
په دغه لیدنه کې، چې د استخباراتو محترم عمومي ریاست، د فرامینو او احکامو د تعقیب او څار محترم لوی ریاست، د کرنې، مالدارۍ او اوبو لګولو محترم وزارت او د کورنیو چارو محترم وزارت، د بلخ محترمې ښاروالۍ درنو استازو او نورو اړوندو محترمو مسؤلینو او انجنیرانو یې ملتيا کوله، له بېلابېلو اړخونو سره یې خبرې وکړې او نظریات وړاندې شول.
په لیدنه کې، د یاد ښارګوټي د ځمکو اړوند یو شمېر اسناد، د ښارګوټي کروکي، او پخواني استعلامونه وکتل شول او غوښتنه وشوه چې په تړاو یې ټول اسناد راوړل شي.
د معلوماتو له مخې، د بلخ ولایت په دولسمه ناحیه کې د شهرنو په نوم هستوګنیز ښارګوټی په (۸۷۰۰) اته زره او اوه سوه جریبه ځمکه کې جوړېږي چې ځینې لومړنۍ چارې یې ترسره شوي دي.
د یاد ښارګوټي د ځمکې د ستونزې د حل په موخه تللی هیئت به تر هر اړخیزو څېړنو او موندنو وروسته، بشپړ راپور چمتو او د ریاسة الوزرا محترم عالي مقام ته وړاندې کړي.
محترم شیخ حمدالله نعماني هڅې پیل کړي چې ژر تر ژره د یاد ښارګوټي او خلکو ستونزې حل او د نورو اقداماتو په تړاو لاره لنډه شي.
