د کور او ښار جوړولو وزیر د ایټالیا هېواد د فلورانس پوهنتون له رئیس سره وکتل
![picture](/sites/default/files/2024-05/2_4.jpeg)
۱۴۴۵/۱۱/۱۹
د کور او ښار جوړولو وزارت محترم سرپرست وزیر شیخ حمدالله نعماني، د خپل کار په دفتر کې د ایټالیا هېواد د فلورانس پوهنتون له اغلې رئیسې مریلا لودا سره وکتل او په بامیان ولایت کې یې د خلکو د ښاري ژوند په اړه خبرې وکړې.
په دغه ناسته کې، د فلورانس پوهنتون اغلې رئیسې مریلا لودا وویل، غواړي په بامیان ولایت کې دوه پروژې پلي کړي چې لګښت یې درې سوه زره ډالر کېږي او د ایټالیا هېواد له لوري ورکول کېږي.
اغلې لودا وویل، د یادو پروژو لپاره یې په لومړني حالت کې پلانونه ترتیب کړي، خو د بیاکتنې او عملي کېدا برخه کې یې د کور او ښار جوړولو وزارت مرسته او همکاري غواړي.
نوموړې وویل، غواړي په بامیان ولایت کې په غارونو کې د اوسېدونکو کورنیو لپاره سل (۱۰۰) کورونه جوړ کړي او د یاد ولایت د زرګرانو سیمې لپاره یې د بهسازۍ پلان ترتیب کړی چې په عملي کولو سره به یې د یادې سیمې وضعیت کې ښه والی راشي.
د کور او ښار جوړولو وزارت محترم سرپرست وزیر شیخ حمدالله نعماني د ایټالیا هېواد د فلورانس پوهنتون رئیسې او له هغې سره مل خاوند ته یې وویل، د زرګرانو د ساحې لپاره جوړ شوی د بهسازۍ پلان به د کور او ښار جوړولو وزارت مسلکي ټیم وګوري او تر ارزونې وروسته به یې د تطبیق په اړه غور وشي.
ښاغلي شیخ حمدالله نعماني وویل، د سل کورونو جوړولو او د بهسازۍ پلان د تطبیق لپاره لومړی اړینه ده چې د ځمکې په اړه معلو مات ترلاسه شي، چې غصب شوې نه وي او که د په امارتي ځمکه کې وي، نو په خبره یې اړتیا ده چې د انتقال لپاره یې امیرالمؤمنین حفظه الله ته وړاندیز وشي.
نوموړي اړوندو مسؤلینو ته لارښوونه وکړه، چې لومړی پلانونه وګوري او له هغې وروسته به وزارت د یادې ځمکې د انتقال لپاره امیرالمؤمنین حفظه الله ته وړاندیز وکړي، چې د نوموړي تر منظورۍ وروسته به یې پر عملي اقدماتو کار پیل شي.