د کور او ښار جوړولو وزارت سرپرست د غور له والي سره وکتل
۱۴۴۵/۱۲/۲۴
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د غور له محترم والي ملا احمد شاه دین دوست او په دغه ولایت کې د کور او ښار جوړولو له محترم رئیس مولوي غلام یحی سره وکتل.
دواړو لوریو په غور ولایت کې د شته ښاري ستونزو، سرپناه برابرولو حل لارو او د پلانونو په جوړولو خبرې وکړې.
د غور محترم والي ملا احمد شاه دین دوست وویل، په غور ولایت کې ډیری خلک سرپناه نه لري او اړتیا ده، چې د کور او ښار جوړولو وزارت په یاد ولایت کې د سرپناه برابرولو، ښاري پراختیا او د پلانونو په جوړولو کې همکاري وکړي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، لومړی به وزارت کې شته پلانونه تر نظر تېر کړي او بیا به د اړتیا له مخې د پلانونو جوړولو لپاره تابیا ونیسي.
ښاغلي الحاج شیخ حمدالله نعماني وویل، غور ولایت کې د سرپناه برابرولو لپاره به د اړتیا له مخې مسلکي او تخنیکي ټیم دغه ولایت ته واستوي، تر څو لومړنۍ چارې ترسره او بیا د پلان جوړولو او یا عملي کولو لپاره زمینه برابره شي.
نوموړي وویل، تر ممکنه بریده به هڅه وکړي چې د غور ولایت د خلکو د سرپناه نشتون ستونزه تر یو بریده حل او د منظمې ښاري پراختیا لپاره کار وکړي.