د کور او ښار جوړولو وزارت د ۱۴۰۳ کال د کاري پلان پر لومړنیو اقداماتو خبرې وشوې
۱۴۴۵/۷/۲۹
د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني په مشرۍ د دې وزارت د ځینو ریاستونو مسؤلینو ناسته وکړه.
په ناسته کې د پالیسۍ او پلان رئیس محترم انجنیر رحمت الله قدیري له لوري د ۱۴۰۳ کال لپاره پر نسبتاً جوړ شوي پلان خبرې وکړې او د لازیاتو نظرونو او ښه والي په موخه یې د غونډې ګډونوالو ته تشریح کړ.
د ناستې ګډونوالو په نوبت هر یو خپل نظر او وړاندیز شریک کړ او غوښتنه یې وکړه چې کاري پلان دې د وزارت د پالیسۍ مطابق جوړ شي.
د ناستې په وروستیو کې د پلان د لا اغېزمنتیا او ښه والي په موخه پرېکړه وشوه، چې د کور او ښار جوړولو وزارت مرکزي او ولایتي ریاستونو ته دې د اړتیاوو درک کولو او معلومولو فورم واستول شي او ضرب الاجل دې ورته تعین شي او دغه راز دې نورو همغږو او همکارو وزارتونو او ادارو څخه دې د هغوی د ۱۴۰۳ کال پر ګډو راتلونکو اقداماتو خبرې وشي.
د ټولو ریاستونو او وزارتونو څخه د معلوماتو ترلاسه کولو وروسته دې دوه کاري کمېټې جوړې، ستونزې، ننګونې، فرصتونه او سرچینې دې تفکیک او لومړیتوبونه دې و ټاکل شي، او بیا دې د وزارت عمومي پالیسۍ ته په کتو منظم او منسجم کاري پلان جوړ او د تائید لپاره دې یې کمېټې ته وړاندې شي.
