د کندهار ولایت په دامان ولسوالۍ کې د مهاجرینو ښارګوټي د جوماتونو له ودانیزو چارو څارنه ترسره شوه
۱۴۴۷/۱۰/۲۸
د کندهار ولایت د کور او ښار جوړولو ریاست اړوند تخنیکي ټیم له لوري، د دوامداره څارنو په لړ کې د دامان ولسوالۍ د مهاجرینو ښارګوټي د جوماتونو د ودانیزو پروژو څخه ساحوي څارنه ترسره شوه.
دغه څارنه د کور او ښار جوړولو وزارت اړوند د ښاري سرغړونو د مخنیوي او د پروژو پر تطبیق د څار محترم عمومي ریاست د هدایت پر بنسټ ترسره شوه.
د څارنې پر مهال د جوماتونو په بېلابېلو برخو کې روانې ودانیزې چارې وڅارل شوې، چې پکې د چت (سلب) قالب تړل، سنګکاري، د موادو انتقال او نور تخنیکي فعالیتونه شامل وو.
همدارنګه، په ځینو برخو کې تخنیکي ستونزې موجودې وې، چې د تخنیکي ټیم له لوري په ساحه کې حل شوې او اړوند اصلاحات ترسره شول.
په هغو ساحو کې چې د سیلاب خطر موجود و، د ودانیو د ثبات او خوندیتوب په موخه د سنګکارۍ او تخنیکي تدابیرو د پیاوړتیا سپارښتنې وشوې، څو د راتلونکې ستونزې مخنیوی وشي.
همدارنګه، د څارنې پر مهال د کارګرو د خوندیتوب موضوع ته جدي پاملرنه وشوه او ټینګار وشو چې ټول کارکوونکي باید د خوندیتوب اصول مراعت کړي او پرته له اړینو محافظتي وسایلو څخه د کار اجازه ورنه کړل شي.
د څارنې په پای کې ټینګار وشو، چې ټولې ودانیزې چارې باید د تخنیکي اسنادو، ملي او نړیوالو معیارونو او د کار د خوندیتوب اصولو سره سم پرمخ یوړل شي.
د ودانیزو پروژو دوامداره تخنیکي څارنه د کیفیت د لوړولو، د ستونزو د پر وخت حل او د معیاري تطبیق د تأمین لپاره مهمه بلل کېږي.
