د کابل – ګردېز عمومي سړک د تخریب شویو برخو د بیا رغونې له چارو څارنه وشوه
۱۴۴۷/۶/۲
لوګر ولایت کې د کور او ښار جوړولو ریاست محترم رئیس مولوي مطیع الله زاهد وایي، د ریاست اړوند تخنیکي ټیم یې د کابل – ګردېز عمومي سړک د تخریب شویو برخو د بیا رغونې له چارو څارنه وکړه.
ښاغلی مولوي زاهد وایي، دغه څارنه د لوګر ولایت د محترم مقام په لارښوونه او همغږۍ، د کور او ښار جوړولو ریاست، د اقتصاد ریاست او د ټولګټو چارو ریاست استازو ګډ هیئت ترسره کړه، چې په کې د کابل – ګردېز عمومي سړک د زیانمنو برخو د بیا ترمیم کارونه وکتل شول او له روانو چارو یې تخنیکي لیدنه وشوه.
نوموړی وایي، یاد سړک چې په ځینو سیمو کې د بېلا بېلو لاملونو له کبله زیانمن شوی و، د بیارغونې چارې یې دا مهال په عملي ډول روانې دي.
تمه ده چې، د ترمیم پروسه به په معیاري ډول پر مخ ولاړه شي، څو د تګ راتګ اسانتیاوې بېرته په بشپړه توګه رامنځته شي.
