د کابل ښار د ودانیو څخه د ښاري سرغړونو نظارت ترسره شو
۱۴۴۷/۰۷/۱۵
د کور او ښار جوړولو وزارت د ښاري سرغړونو د مخنیوي د عمومي ریاست د لارښوونې له مخې، د ښاري سرغړونو ته د رسېدنې او د پروژو د تطبیق د نظارت ریاست تخنیکي او عامه پوهاوي ټیمونو د کابل ښار له هغو ودانیو څخه چې اوس جوړېږي، نظارت ترسره کړ.
یاد نظارت د کابل ښار د لسمې ناحیې په بېلابېلو سیمو لکه شهرنو، قلعه فتحالله او تایمني کې ترسره شو. د نظارت پر مهال ځینې ودانیزې پروژې وڅېړل شوې او د اړوندو پروژو له مالکینو وغوښتل شول تر څو خپل رسمي اسناد او د ودانیزو چارو جوازونه د ښاري سرغړونو ته د رسېدنې ریاست ته وسپاري، څو موضوع تر څېړنې لاندې ونیول شي.
د کور او ښار جوړولو وزارت د ښاري سرغړونو د مخنیوي د عمومي ریاست له لوري، د ښارونو د منظم پرمختګ او د منظورو ښاري پلانونو د څارنې په موخه، د کابل ښار په بېلابېلو ناحیو کې د ودانیو څخه دوامدار نظارت ترسره کېږي.
