د کابل ښار د دشت برچي د شل زره کورنیو لپاره د اوبو رسولو پروژې د تطبیق پر څرنګوالي د همغږۍ غونډه ترسره شوه
دا غونډه د ښار جوړولو او ځمکو وزارت د ښاري چارو مرستیال محترم روښان ولسمل په مشرۍ او په پارلماني چارو کې د جمهوري ریاست سلاکاره محترمه کبرا مصطفوی، د UNOPS موسسي، د ډاینامیک ویژن شرکت، د کابل د اوبو رسولو ریاست او د خلکو استازو په ګډون د کابل ښار د دشت برچي د شل زره کورنیو لپاره د اوبو رسولو پروژې د تطبیق پر څرنګوالي ترسره شوه.
په سرکې، د UNOPS موسسې او اړونده مسوولینو له خوا د پروژې په اړه تخنیکي معلومات وړاندې شول او د دشت برچې سیمې د خلکو استازي د دې پروژې د تطبیق په اړه وویل چې د سیمې خلکو د زیر زمیني اوبو د کچې د ټیټوالي، او څښاک اوبو د څاګانو د وچوالي او د دې پروژې څخه د یو شمېر کسانو محرومیت د دې لامل شوي چې خلک د یادې پروژې د تطبیق پر وړاندې خنډ جوړ کړي او د ښار جوړولو او ځمکو وزارت څخه د دې پروژې د تطبیق لپاره د همکارۍ غوښتنه وکړه.
ورپسې، د ښار جوړولو او ځمکو وزارت د ښاري چارو مرستیال محترم روښان ولسمل د پروژې په تړاو د تخنیکي معلوماتو او شته ستونزو د اورېدو وروسته وویل چې دا پروژه د دشت برچې ۲۰ زره کورنیو لپاره په پام کې نیول شوې او د څښاک پاکو اوبو ته لاسرسۍ د خلکو حق دی. محترم روښان ولسمل زیاته کړه چې د ښار جوړولو او ځمکو وزارت د پروژې د طرحې او ډیزاین د تعدیل او د دې پروژې د ښه تطبیق لپاره منطقي او تخنیکي حل لاره به په نظر کې ونیسي.
د ښاري چارو مرستیال د دشت برچي خلکو له استازي وغوښتل چې د سیمې د خلکو سره په تفاهم شته ستونزې حل او د دې مهمې او ټولګټې پروژې د تطبیق لپاره چې پایله یې د خلکو هوساینه ده لاره هواره کړي.
د ښار جوړولو او ځمکو وزارت د ښاري چارو مرستیال همدارنګه زیاته کړه چې د دې پروژې د مالي ستونزې د حل لپاره په کابل کې د جنوبي کوریا له سفارت سره به موضوع شریکه کړي او د اړتیا په صورت کې د یادې پروژې د ښه تطبیق لپاره جمهوري عالي مقام ته د پروژې د مالي ستونزې د حل لپاره یو مشخص وړاندیز واستوي.
###
