د کابل ولایت د مهاجرینو د ښارګوټي تفصیلي پلان منظور شو
۱۴۴۷/۶/۳
د کور او ښار جوړولو وزارت محترم وزیر الحاج مولوي نجیب الله حیات حقاني په خپل کاري دفتر کې، د کابل ولایت د مهاجرینو د ښارګوټي اړوند تفصیلي پلان لاسلیک او منظور کړ.
د دغه وزارت د ښاري چارو محترم مرستیال شیخ مدارعلي کریمي بامیاني وایي، یاد پلان د ارغندې په ساحه کې د ۱۱۳۸ جریبه مساحت ځمکې لپاره جوړ شوی چې ۱۲۱۵ استوګنیزې نمرې به ولري.
د معلوماتو له مخې، په ښارګوټي کې به د استوګنې ترڅنګ د عامه خدماتو بنسټیز تأسیسات لکه منظم سړکونه، برېښنا، د پاکو اوبو شبکې، فاضلاب سیستم، ښوونځي، درملتونونه، روغتیايي مرکزونه، جوماتونه او شنې ساحې هم په پام کې ونیول شي، تر څو د مېشتېدونکو لپاره د معیاري ژوند اسانتیاوې برابرې شي.
د کور او ښار جوړولو وزارت چارواکي ټینګار کوي چې د پلان منظورول د بېرته راستنېدونکو د ژوند د ثبات او د هغوی د اساسي اړتیاوو د پوره کولو په لور مهم ګام دی.
د دوی په وینا، د ښارګوټي تفصیلي نقشه د انجینري معیارونو پر بنسټ جوړه شوې او هڅه کېږي چې د پروژې عملي چارې په وخت سره پیل او بشپړې شي.
دا چاره د هغو زرګونو کورنیو لپاره د امید څرک ګڼل کېږي چې له کلونو راهیسې د مناسب استوګنځای له نشتوالي سره مخامخ دي.
تمه کېږي چې د ښارګوټي د جوړېدو له پیل سره به په سیمه کې د کار فرصتونه هم زیات شي او د خلکو اقتصادي وضعیت به د پام وړ ښه شي.
