د کابل ــــــ بګرام سړک ډیزاین شوې چارې د لا پرمختګ په موخه څېړل کېږي
۱۴۴۷/۳/۷
د کور او ښار جوړولو وزارت محترم وزیر الحاج مولوي نجیب الله حیات حقاني، د نوي کابل ښار په اډانه کې د کابل ــــ بګرام جوړېدونکي سړک د ډیزاین شوو چارو جاج واخیست.
په دغه برخه کې ګمارل شوې کمېټې، خپل فعالیتونه او لاسته راوړنې د یو پرزنټېشن له لارې له محترم وزیر او د غونډې ګډونوالو ته وړاندې کړ.
موخه دا وه، چې څنګه کېدای شي، د کابل ــــ بګرام دېرش کیلو متره اوږد او د سل متره په پلنوالي جوړېدونکی سړک د یاد ښار د ماسټر پلان او د ساختاري پلان سره سم جوړ شي.
ګمارل شوې کمېټې وویل، یاد سړک د ماسټر پلان او ساختاري او تفصیلي پلان مطابق ډیزاین شوی او په خبره یې تر دې دمه کومه ستونزه نه ده تر سترګو شوې.
د کور او ښار جوړولو وزارت محترم وزیر الحاج مولوي نجیب الله حیات حقاني وویل، د دغه سړک په اړه ترلاسه شوې پایله دې د لا بهتروالي، اغېزمنتیا او د نورو اړوندو وزارتونو او ادارو د راتلونکو اقداماتو سره د سمون په موخه له متخصص ټیمونو سره شریکه شي.
ښاغلي وزیر حقاني وویل، نوی کابل ښار یوه ستره ملي پروژه ده او لازمه ده چې چارې یې د فني او تخنیکي پلوه پرمختللې او له نیوکو پرته ترسره شي.
نوموړي وویل، هر وزارت یا اداره ځانګړی تخنیکي تخصص لري لکه ترانسپورت، انرژی، چاپېریال، اوبو رسونه، مخابرات او داسې نور، چې د اړوندې ادارې ګډون به مرسته وکړي، تر څو پروژه له هر اړخه تخنیکي پیاوړې، معیاري او د ستونزو څخه پاکه شي.
ښاغلي وزیر زیاته کړه، په سترو ملي پروژو کې همکاري او همغږي د ادارو ترمنځ د باور فضاء لوړوي، چې دا اعتماد بیا د نورو ګډو پروژو لپاره یو ښه بنسټ جوړوي.
د غونډې ګډونوالو ومنله چې د ډیزاین چارې به له متخصصینو سره شریکې کړي او تمه ده چې یوې لا ښې او مثبتې پایلې ته ورسېږي.
د کور او ښار جوړولو وزارت د پروژو په جوړښت او تطبیق کې له بشپړې پاملرنې کار اخلي، ترڅو یې چارې اغېزمنې او ګټورې پایلې ولري.
