د ښار جوړولو او ځمکو وزارت سرپرست د پلازمېنې زون د پراختیا ملي ادارې څخه لیدنه وکړه
۱۴۴۳/۱۰/۱۲
د پلازمېنې زون د پراختیا ملي اداره چې په تېر کې یوه خپلواکه اداره او د پلازمېنې زون د پراختیا لپاره یې کارونه کول، له دې وروسته به یې فعالیتونه د ښار جوړولو او ځمکو وزارت په اډانه کې ترسره کېږي.
د ښار جوړولو او ځمکو وزارت سرپرست محترم مولوي حمدالله نعماني د پلازمېنې زون پراختیا ادارې د شته ستونزو د حل او د فعالیتونو د لاګړندیتوب په موخه د یادې ادارې له ټولو دفترونو او شعبو څخه لیدنه وکړه.
په دغه لیدنه کې د پلازمېنې زون د پراختیا مسؤلینو د خپلو دندو، مسؤلیتونو، د برنامو او پروژو د وضعیت او نورو برخو کې ښاغلي وزیر ته بشپړ معلومات وړاندې کړل.
د ښار جوړولو او ځمکو وزارت محترم سرپرست وزیر مولوي حمد الله نعماني د نوموړې ادارې له مسؤلینو او کار کوونکو سره د پروژو، برنامو او په ځانګړې توګه د کابل جدید په اړه هر اړخیزې خبرې وکړې.
محترم سرپرست د کابل جدید د چارو پرمختګ په موخه مسؤلینو ته لازمې لارښوونې وکړې او هغه لارې چارې یې په ګوته کړې چې له مخې یې د یاد ښار د جوړېدو چارې چټکې کېږي.
