د ښار جوړولو او ځمکو وزارت او د افغان مېرمنو سوداګرۍ او صنايعو خونې تر منځ د همکارۍ هوکړه لاسليک شوه
دا هوکړه د ښار جوړولو او ځمکو وزارت سرپرست محترم محمد جواد پيکار او د افغان مېرمنو د سوداګرۍ او صنايعو خونې د مديره پلاوي رئيسې اغلې افسانه رحيمي تر منځ په کابل او نورو ولايتونو کې د مېرمنو لهخوا د جوړو شويو مارکېټونو د لا ښه تنظيم او د نويو مارکېټونو د رامنځته کولو په موخه لاسليک شوه.
د ښار جوړولو او ځمکو وزارت سرپرست محترم محمد جواد پيکار د هوکړې د لاسلیک پر مهال وويل، د دې هوکړې لهمخې به ښار جوړولو او ځمکو وزارت په ۳۴ ولايتونو کې سوداګرو مېرمنو ته د مارکېټونو او نندارتونونو د جوړولو په موخه ځمکې او دولتي املاک په اجاره ورکړي.
د ښار جوړولو او ځمکو وزارت مشرتابه زياته کړه، د افغان مېرمنو د سوداګرۍ او صنايعو خونې ته به دا ځمکه او دولتي املاک په ځانګړي تخفيف د لسو کلونو لپاره ورکړل شي.
دا هوکړهليک چې اته مادې لري، د ښاري پراختيا عالي شورا تر تصويب وروسته په لومړي پړاو کې په کابل، بلخ، هرات، ننګرهار، بادغيس، بغلان، جوزجان، بدخشان، باميان، تخار، سرپل او غور ولايتونو کې پلی کېږي.
ښار جوړولو او ځمکو وزارت د افغانستان اسلامي جمهوريت پراختيايي پاليسۍ لهمخې په هېواد کې د خصوصي سکټور ودې او په ځانګړي ډول د پانګېاچوونکیو سوداګرو مېرمنو لپاره د اسانتيا رامنځته کولو ته ژمن دی. همدارنګه دا وزارت به مېرمنو ته په سوداګرۍ او صنايع برخو کې د کاري فرصتونو او پانګوونې زمينه هم برابره کړي.
ټاکل شوې ښار جوړولو او ځمکو وزارت په ۱۳۹۹ لمريز کال کې په کابل، هرات، ننګرهار، لغمان، بلخ او خوست ولايتونو کې د يو ميليارد امریکايي ډالرو په ارزښت د پانګوونې ۵۰ کڅوړې اعلان ته وسپاري.
