د ښاري ځمکو د بیې د ټاکلو د اصولو د بیا کتنې غونډه وشوه
1447/03/07
د ښاري ځمکو د بیې د ټاکلو د اصولو د طرزالعمل د بیاکتنې غونډه د مسکن ودانیزو چارو او برنامو د پراختیا د محترم مرستیال مولوي گل زرین صابر په مشرۍ د اړوندو رئیسانو په ګډون ترسره شوه.
د غونډې په پیل کې، د مسکن محترم مرستیال د موضوع پر اهمیت خبرې وکړې او ټینګار یې وکړ چې د طرزالعمل مواد باید داسې ترتیب او تنظیم شي چې نه یوازې په کابل ښار کې بلکې د هېواد په ټولو ښارونو او ښاروالیو کې د تطبیق وړ وي.
نوموړي همداراز د طرزالعمل د ژر تنظیم او لازم دقت پر اړتیا ټینګار وکړ او له رئیسانو او ګډونوالو یې وغوښتل چې نور اړوند ریاستونه او ښکېل کسان هم د دې طرزالعمل د چمتو کولو او تنظیمولو په بهیر کې شامل کړي.
د غونډې په دوام کې یو شمېر رئیسانو خپلې نظریې او وړاندیزونه د طرزالعمل د متن د لا پیاوړي کولو لپاره وړاندې کړل او ټینګار یې وکړ، چې اړوند ریاستونه باید خپلې تخنیکي او حقوقي نظریې شریکې کړي، څو د هغوی د یوځای کولو په برخه کې لازم تصمیم ونیول شي.
