د ښارجوړولو او ځمکو وزارت سرپرست د چین له سفیر سره وکتل
د ښارجوړولو او ځمکو وزارت سرپرست محترم محمد جواد پیکار د دې وزارت د خصوصي سازۍ او مسکن چارو معینانو په حضور کې د چین خلق جمهوریت له نوي سفیر محترم وانګ یې سره په خپل کار ځای کې وکتل.
محترم محمد جواد پیکار د چین خلق جمهوریت نوي سفیر ته د ښه راغلاست تر څنګ هغه ته په افغانستان کې د نوي ماموریت مبارکې ورکړه او د دوه اړخیزو اړیکو ټنګښت یې خورا مهم وباله.
د ښارجوړولو او ځمکو وزارت سرپرست وویل، داسې ډېر فرصتونه شته چې افغانستان له هغه څخه د استفادې لپاره د دولت مرستې او د چین خلق جمهوریت د خصوصي سکټور پانګونې ته لېوالتیا لري. نوموړي د کابل ښار په نیله باغ سیمه کې د چینایانو ښارګوټي ته په اشارې څرګنده کړه چې شته فرصتونو ته په کتو، دوه اړخیزې همکارۍ به یوازې د کور جوړولو پروژو پورې محدودې پاتې نهشي.
محترم محمد جواد پیکار زیاته کړه، د مسکن اړتیا ته په کتو، افغانستان د منځنۍ اسیا په کچه د خصوصي سکټور پانګونې لپاره ښه فرصتونه لري چې په دې برخه کې چین کولای شي رغنده رول ولوبوي.
له هغه وروسته د چین خلق جمهوریت سفیر، محترم وانګ یې د ښارجوړولو او ځمکو وزارت له رهبرۍ څخه د قدردانۍ تر څنګ وویل، هېواد یې لوې پروژې په ځانګړي ډول په افغانستان کې ۱۰ زره هستګونیز واحدونه تمویلوي او له شته پرمختیايي فرصتونو څخه به استفاده وکړي.
نوموړي زیاته کړه، د چین خلق جمهوریت، د ځمکوالۍ او کور جوړولو په برخه کې بریالۍ تجربه لري او بېجېنګ لېوالتیا لري چې دا تجربه له افغانستان سره هم شریکه کړي.
ورپسې د ښارجوړولو او ځمکو وزارت د مسکن چارو معین محترم عزیز احمد ګلستاني د چینایانو ښارګوټي لومړي فاز هوکړهلیک، د ۵۰۰ مېلیونه چینايي ینو په ارزښت د ۱۴۰۰ ستګونیز واحدونو په اړه معلومات ورکړل او وې ویل، دا هوکړهلیک د ښارجوړولو او ځمکو وزارت له لوري بشپړه شوی او له کوچنیو تخنیکي بحثونو او تائید وروسته به لاسلیک او د بنسټ ډبره یې کېښودل شي.
محترم محمد جواد پیکار همداراز وویل، د افغانستان اسلامي جمهوریت جمهور رئیس د اقتصادي لیدلوري له مخې، اقتصادي ځان بسیاینه د حکومت لومړیتوب دی او دې هدف ته د رسېدو لپاره له دولتي ځمکو د اقتصادي ودې لپاره موثره استفاده د ښارجوړولو او ځمکو وزارت له کاري لومړیتوبونو ګڼل کېږي چې په دې برخه کې د چین خلق جمهوریت همکاري به ګټوره تمامه شي.
محترم محمد جواد پیکار زیاته کړه، افغانستان د چین له ساختماني ټکنالوژۍ څخه استفادې ته لېوالتیا لري او هیلهمندي یې وښوده چې په نږدې راتلونکې کې د افغانستان او چین تر منځ د لا ډېرو همکارویو د ودې لپاره لار پرانیستل شي.
په پای کې دواړه لوريو په کابل ښار کې د چینایانو ښارګوټي په اړه د لنډ او معلوماتي فلم په لیدلو سره د دوه اړخیزو همکاریو په دوام ژمنه وکړه.
