د پکتیکا مرکز ښرنې ښار د پراختیا لپاره عملي چارې پیل شوې
3/9/1445
پکتیکا ولایت کې د کور او ښار جوړولو محترم رئیس مولوي محمد طاهر سیف الجهاد وایي، د دغه ولایت د مرکز ښرنې ښار د پراختیا لپاره عملاً کارونه پیل شول، چې ورسره به د ښرنې ښار سپینې ساحې په پراختیایي پلان کې شاملي شي.
ښاغلی مولوي سیف الجهاد وایي، د ښرنې ښار د پراختیایې پلان د منظورۍ لپاره له پلازمېنې کابل څخه هیئت ورغلی او هلته یې د ښرنې له محترم ښاروال مولوي محمد ناصر هلال سره کتلي دي.
د نوموړي په خبره، د ښرنې ښاروال ورغلي هیئت ته له خپله اړخه د بشپړې همکارۍ ډاډ ورکړ او زیاته یې کړه، چې هېواد کې د امنیت په تامین سره د دولت ترڅنګ خصوصي سکتور هم په ښارونو کې د پانګونې هوډ لري.
د معلوماتو له مخې، پکتیکا ولایت ته د کور او ښار جوړولو وزارت تللی هیئت به ښرنه ښار کې د توپوګرافي سروې او کروکي پرمټ د پراختیایي او اصلاحي پلان د منظورۍ زمینه برابره کړي، چې ورسره به د ښرنې ښار سپینې ساحې په پراختیایي پلان کې شاملي شي.
