د پکتيکا په اورګون ولسوالۍ کې د ماسټر پلان د تطبیق چارې پیل شوې
![picture](/sites/default/files/2024-05/whatsapp_image_2024-05-04_at_10.43.32_am.jpeg)
۱۴۴۵/۱۰/۲۵
د کور او ښار جوړولو وزارت د هېواد په کچه ولایتونو او ولسوالیو لپاره بېلا بېل پلانونه جوړوي چې په پلي کېدا سره به یې د خلکو ښاري ستونزې ختمې شي.
په همدې لړ کې، د کور او ښار جوړولو وزارت د پکتیکا ولایت د اورګون ولسوالۍ بازار ته له کلونو ځنډ وروسته د ولس په غوښتنه ماسټر پلان جوړ کړ.
پکتیکا کې د کور او ښار جوړولو ریاست محترم رئیس مولوي محمد طاهر سیف الجهاد وایي، د یاد ماسټر پلان د تطبیق په مهال ورغوښتل شوو مراسمو کې د پکتیکا والي الحاج مولوي عبدالخالق عابد، د علماوو شورا رئیس شيخ عبدالقدوس عظيمي، د اطلاعات او کلتور رئیس، د کرنې او مالدارۍ رئیس، د عامې روغتیا رئیس، د امنیت امر، د فرمانونو د تطبیق رئیس، د عدلیې رئیس، او د نورو بېلا بېلو ریاستو رئیسانو، امرینو، د اورګون ولسوالۍ مسؤلينو، قومي مشرانو او ځوانانو ګډون کړی وو.
په یادو مراسمو کې له خلکو غوښتنه وشوه چې باید د یاد ماسټر پلان په تطبیق کې بشپړه همکاري وکړي.
د ماسټر پلان په تطبیق سره به د اورګون ولسوالۍ بازار چې د(۹) ولسوالیو مرکز بلل کېږي، په عصري ډول جوړ او د پانګونې او سوداګرۍ لپاره چمتو شي.
په مراسمو کې، د کور او ښار جوړلو محترم رئیس مولوي محمد طاهر سیف الجهاد وویل، د اورګون سربېره یې د ځینو نورو ولسوالیو لپاره خپل مسلکي ټیم برابر کړی چې په بازارونو کې ماسټر پلان د ټولو پړاونو تر بشپړېدا وروسته عملي کړي.
دمګړۍ د پکتیکا ولایت د نورو ولسوالیو لپاره د ماسټر پلان د جوړولو په موخه د توپوګرافي سروې ترسره شوي، چې د نورو پړاونو تر بشپړېدا وروسته به یې د ماسټر پلان د عملي کولو پرانسته وشي.