د نورستان ښارجوړولو ریاست اداري ودانۍ ګټې اخیستنې ته وسپارل شوه
ښارجوړولو او ځمکو وزارت د نورستان ولایت په مرکز پارون ښارکې د دې ولایت د ښارجوړولو ریاست اداري ودانۍ رغنیزې چارې بشپړې او ګټې اخیستنې ته یې وسپارله.
دا دوه پوړیزه اداري ودانۍ په ۲۱۸ متر مربع ځمکه کې، چې ۱ کنفرانس خونه، ۱۱ کاري دفترونه، دوه پخلنځي او ۷ عصري تشنابونه لري د ۱۲ میلیونه افغانیو په ارزښت د ښارجوړولو او ځمکو وزارت د پراختیايي بودیجې څخه جوړه شوې ده.
ښارجوړولو او ځمکو وزارت په ولایاتو کې خپلو اداري واحدونو ته د ودانیو په جوړولو سره، د دې ترڅنګ چې اداري کارکوونکو ته مناسب کاري چاپریال برابروي ترڅنګ یې د ښارجوړولو او ځمکو په برخه کې د ملي برنامو تطبیق ته هم زمینه مساعدوي.
###
