د میدان وردګ ولایت کې ښاري پراختیا رامنځته کېږي
۱۴۴۵/۱۰/۱۷
د میدان وردګ ولایت د کور او ښار جوړولو ریاست محترم رئیس مولوي عبدالقیوم سیف العمر وايي، په دغه ولایت کې د نفوسو کچه کې زیاتوالی راغلی، شته ښاري وضعیت بسنه نه کوي او اړتیا ده چې خلکو ته ښاري اسانتیاوې رامنځته شي.
ښاغلی مولوي سیف العمر وایي، په همدې موخه یې د شته ښاري وضعیت ارزولو او ورته د پلان جوړولو په پار د ښار له ځینو برخو لیدنه وکړه.
هغه وایي، په دغه لیدنه کې ورسره د میدان وردګ ولایت د محترمې ښاروالۍ استازو او د کور او ښار جوړولو ریاست تخنیکي ټیم ملتیا کوله.
سیف العمر زیاته کړه، په ښار کې یې د ګڼو نورو سیمو ترڅنګ د تخت کوتل او جوقول له ساحو لیدنه وکړه.
د کور او ښار جوړولو وزارت د هېواد په کچه د ټولو ښارونو اړتیاوې، اسانتیاوې او ځانګړتیاوې ارزوي او له مخې یې د اړتیا سره سم ښاري وده او پراختیا رامنځته کوي.
