د قالین اوبدونکو د ښارګوټو او کابل کې د چینایانو د پروژې فعالیتونه وارزول شول
۱۴۴۳/۰۹/۱۶
د ښار جوړولو او ځمکو وزارت سرپرست محترم مولوي حمد الله نعماني د قالینو د صنعتي او رهایشي ښارګوټو او د چینایانو پروژې ستونزې او ننګونې وارزولې او د فعالیت په اړه یې څېړنه وکړه.
دناستې په پیل کې د قالینو صنعتي او رهایشي ښارګوتو مسؤلینو ، د دغې پروژې د رامنځته کېدو د موخې په تړاو یادونه وکړه چې د قالینو صنعت ته وده ورکړل شي، سوداګري یې له افغانستان او د افغانستان په نوم وشي، بازارموندنه ورته وشي، خلکو ته د کار کولو زمینه برابره شي، د فقر او بې روزګارۍ کچه راکمه شي، د قالینو اوبدلو لپاره مناسبه زمینه او مناسب چاپېریال رامنځته شي، صنعت کارانو ته لازمې اسانتیاوې برابرې شي، خپل ځایونه ولري چې په ټوله کې یې ګټه هېواد ته راځي او د قالینو په صادراتو کې به مهم رول ولوبوي.
په دغه ناسته کې د کابل په شکر درې ولسوالۍ کې د قالینو د صنعتي او رهایشي ښارګوټي، په ننګرهار بهسودو کې د قالینو ښارګوټي، کندز او د بلخ حیرتانو په دوه لارې کې چې ټول څلور د قالینو اوبدلو او رهایشي ښارګوټي کېږي فعالیتونه یې وارزول شول.
دغه راز په یاده ناسته کې د چین جمهوري دولت لخوا په کابل کې د لس زره مسکوني کورونو د جوړولو پروژې په اړه هم بشپړې خبرې وشوې او د یادې پروژې مسؤلینو د فعالیتونو، ستونزو او نورو اقداماتو په اړه بشپړ معلومات وړاندې کړل.
دوی پر دې خبرې وکړې چې څنګه کېدای شي په یادو برخو کې ستونزې او ننګونې ختمې او فعالیتونه بیرته پیل شي.
د ښار جوړولو او ځمکو وزارت سرپرست محترم مولوي حمد الله نعماني یاد ښارګوټي او د چینایانو پروژه د ملي اقتصاد په پیاوړتیا او ثبات، د ټولنیز او چاپېریالي وضعیت ښه کېدو او خلکو ته د کار زمینې پیدا کېدو او اسانتیاو لپاره مهمې وبللې او د ستونزو د حل لپاره یې اړوندو مسؤلینو ته لازمې او ګټورې لارښوونې وکړې چې په عملي کولو سره به یې شته ستونزې ختمې او لازم اقدامات ترسره شي.
