د غور په فیروزکوه ښار کې د شپږمې برخې د تفصیلي پلان د تطبیق چارې پیل شوې
۱۴۴۷/۶/۱۸
د کور او ښار جوړولو وزارت، د سروې او جي، ای، ایس ریاست محترم رئیس حافظ انجنیر محمد یوسف لطیف وایي، د ریاست اړوند تخنیکي ټیم یې د غور ولایت په فېروز کوه ښار کې د منظمې پراختیا په موخه د شپږمې برخې د تفصیلي پلان د تطبیق بهیر پیل کړ.
ښاغلی حافظ لطیف وایي، د یاد پلان د تطبیق ساحه ۱۱۹۹.۴۷ جریبه ځمکه رانغاړي چې د ښار د نوې ودې، معیاري جوړښت، منظمو سړکونو، عامه تأسیساتو او منظمې ښاري نقشې د رامنځته کېدو لپاره ځانګړې شوې ده.
نوموړی، د تفصیلي پلان د تطبیق اساسي هدفونه د ښار د پراختیا لپاره د واضح او معیاري نقشې رامنځته کول، د بېنظمۍ او غیرقانوني جوړښتونو مخنیوی، د ښاري خدمتونو او عامه تأسیساتو لپاره د مناسب ځای ټاکل او د پلان مطابق د نویو ابادیزو ساحو تنظیم او ترتیب بیانوي.
تمه ده چې د پلان تطبیق به د فیروزکوه ښار د منظم ښار جوړولو په برخه کې مهم بدلونونه رامنځته کړي او د خلکو لپاره به ښاري اسانتیاوې لا معیاري کړي.
