د عالیقدر امیرالمؤمنین حفظه الله له لوري د هرات ښار ماسټر پلان منظور شو
۱۴۴۸/۱/۸
د کور او ښار جوړولو وزارت د ملي جامع پلانونو او ښاري مطالعاتو ریاست د متخصص او مسلکي ټیم له لوري، د هرات ښار ماسټر پلان د هر اړخیزو تخنیکي مطالعاتو، ساحوي ارزونو او د ښاري پراختیا د اړتیاوو او ظرفیتونو له بشپړې څېړنې وروسته د یو کال په موده کې ترتیب شو.
دغه ماسټر پلان د کور او ښار جوړولو وزارت د محترم وزیر الحاج مولوي نجیب الله حیات حقاني له لوري پیشنهاد او د ریاسة الوزرا محترم مقام له خوا تائید او د اسلامي امارت د زعیم عالیقدر امیرالمؤمنین حفظه الله تعالی له لوري تېره ورځ سه شنبه د ۱۴۴۸/۱/ ۷ نېټه منظور شو .
د هرات ښار ماسټر پلان له منظورۍ وروسته بېرته د کور او ښار جوړولو وزارت محترم وزیر ته وسپارل شو، چې دمګړۍ په تخنیکي ارشیف کې خوندي او د یو لړ مراسمو په ترڅکې به د هرات محترمې ښاروالۍ ته تسلیم شي.
یاده ښاروالي به د دغه ماسټر پلان د تطبیق لپاره خپلې هلې ځلې پیل کړي، چې د کور او ښار جوړولو وزارت به یې د تطبیق له چارو څارنه هم کوي.
دا سند، د هرات ښار د ښاري پراختیا تر ټولو مهم ستراتیژیک چوکاټ بلل کېږي، چې د لنډمهال، منځمهال او اوږدمهال پرمختګ مسیر ټاکي او د ښاري پراختیا د اغېزمن مدیریت لپاره بنسټیزه زمینه برابروي.
دا ماسټر پلان په (۱۶۲۶۷۲) هکتاره ځمکه یا په اصطلاح (۱۶۲۶) کیلو متر مربع مساحت کې تطبیق کېږي، چې د هرات ښار اوسنی او راتلونکی مساحت په کې شامل دی.
په دې ماسټر پلان کې د هرات ښار اوسنۍ او راتلونکې اړتیاوې په بېلابېلو برخو کې په پام کې نیول شوې دي، چې په کې د بېلابېلو تراکمونو استوګنیزې سیمې، سوداګریزې ساحې، مختلطې سیمې، صنعتي، اداري، تعلیمي، روغتیايي، لوژستیکي، تفریحي او کرنیزې ساحې، د ښاري ترانسپورټ شبکې، شنې سیمې او همدارنګه تاریخي او فرهنګي ساحې شاملې دي.
د کور او ښار جوړولو وزارت محترم وزیر الحاج مولوي نجیب الله حیات حقاني، د دې سترې طرحې پر اهمیت ټینګار وکړ او هیله یې څرګنده کړه، چې د هرات د نوي ماسټرپلان عملي کېدل به د اقتصادي ودې، د کورنیو او بهرنیو پانګونو د جذب، د کاري فرصتونو د رامنځته کېدو، د ښاري زیربناوو د پراختیا او د هېواد د مهم فرهنګي، تاریخي او اقتصادي مرکز په توګه د هرات ښار د لا پیاوړتیا لامل شي.
د یادونې وړ ده، چې د کندهار او ننګرهار ولایتونو ماسټر پلان به په راتلونکو دوه میاشتو کې بشپړ او د منظورۍ لپاره هم وړاندې شي.
البته لا د مخه د غور،کونړ، او تخار ولایتونو لپاره د ستراتېژیک پلانونو پر جوړولو کار روان دی، چې ګام په ګام به بشپړ، تائید او وروستۍ منظوري ترلاسه کړي.
