د دیني علومو او احکامو په برخه کې پر هغو کار کوونکو ډالۍ ووېشل شوې چې غوره نمرې یې ترلاسه کړې وې
![picture](/sites/default/files/2022-09/whatsapp_image_2022-09-15_at_11.18.18_am.jpeg)
17/2/1444
د ښار جوړولو او ځمکو وزارت ۵ تنو هغه کار کوونکو ته چې د دغه وزارت د دعوت او ارشاد ریاست په دیني درسونو او د شرعي احکامو په ازموینه کې یې غوره نمرې ترلاسه کړې وې، ډالۍ ووېشل شوې.
د دغه وزارت د دعوت او ارشاد ریاست له خوا په جوړې شوې غونډه کې د ښار جوړولو او ځمکو وزارت محترم سرپرست مولوي حمدالله نعماني او د دې وزارت نورو مسؤلینو د وزارت کارکوونکو ته په دیني برخه کې لازمې لارښوونې وکړې.
د ښار جوړولو او ځمکو وزارت ښاغلي سرپرست وزیر مولوي حمدالله نعماني وویل: ټول انسانان اړ پیدا شوي او هغه چې هېڅ اړتیا نه لري، د الله تعالی ذات دی.
د مولوي نعماني په خبره، الله (ج) د انسانانو لپاره د عقل ترڅنګ لارښود او پیغمبران رالیږلي، ترڅو دوی ته د ښې او سمې لارې لارښوونه وکړي.
مولوي نعماني زياته کړه، په معاصرو علومو کې د تخصص تر څنګ په ديني احکامو پوهېدل او پرې عمل کول لازمي خبره ده.
پر دې سربېره یې د سورت اخلاص د ژباړې او تفسیر برخه کې هر اړخیزه وینا وکړه.
دغه راز د دغې غونډې له مېلمنو څخه يو تن مولوي ذبيح الله هم د خداى او د رسول الله (صلى الله عليه و سلم) په احکامو او د هغوى د احکامو پر عملي کولو ټينګار وکړ.
ورپسې د ښار جوړولو او ځمکو وزارت د دعوت او ارشاد رئیس مفتي عبدالاحد حقاني د دیني علومو او دیني احکامو د انعامونو د ویش په مراسمو کې د دغه وزارت له ټولو کار کوونکو وغوښتل چې د افغانستان د اسلامي امارت د امیرالمؤمنین د حکم سره سم خپل صورت او سیرت د اسلامي شریعت په رڼا کې له اسلامی احکامو سره سم برابر کړي.
مفتي عبدالاحد حقاني وويل، هغه درسونه چې هره ورځ د ماسپښین له لمانځه وروسته د اسلامي شريعت له نصاب سره سم تدريس کېږي، ټول کار کوونکي يې بايد زده کړي عمل پرې وکړي او نورو ته دې هم ورسوي.
د ښار جوړولو او ځمکو وزارت د دعوت او ارشاد ریاست مسؤلینو په دغه وزارت کې د سهار، ماسپښین او مازدیګرله خوا د اسلام دین د احکامو، د قران کریم تجوید او نورو فقهي مسایلو په اړه د تدریس لړۍ پیل کړې، چې د وزارت ډیری کار کوونکي ترې ګټه پورته کوي.