د دریم پروان له سیمې څخه د ښاري سرغړونو د مخنیوي په موخه ساحوي څارنه ترسره شوه
۱۴۴۸/۱/۲۳
د کور او ښار جوړولو وزارت د کیفیت کنټرول او د ښاري سرغړونو د مخنیوي لوی ریاست اړوند، د ښاري سرغړونو د مخنیوي ریاست تخنیکي ټیم د دوامدارو څارنو په لړ کې د کابل ښار د څلورمې ناحیې اړوند د دریم پروان ښارګوټي له سیمې څخه د ښاري سرغړونو د مخنیوي په موخه ساحوي څارنه ترسره کړه.
د څارنې پر مهال هغه ودانیزې پروژې وارزول شوې، چې د نافذه قوانینو، تصویب شویو ښاري پلانونو او د ګاونډیانو د حقونو د احتمالي نقض نښې پکې موجودې وې.
همدارنګه، له هغو مالکینو څخه چې د خپلو پروژو قانوني اسناد، جوازونه او نور اړوند مدارک یې نه وو وړاندې کړي، وغوښتل شول چې یاد اسناد د ښاري سرغړونو د مخنیوي ریاست ته وسپاري، څو له تخنیکي ارزونې او د تصویب شویو پلانونو سره تر مطابقت وروسته، د هر ډول سرغړونې په صورت کې لازم قانوني اقدامات ترسره شي.
د دغې څارنې موخه د تصویب شویو ښاري پلانونو د دقیق تطبیق ډاډمنول، د غیرقانوني ودانیزو فعالیتونو مخنیوی، د ښاري نظم ټینګښت، د ګاونډیانو د حقونو خوندیتوب او د ساختماني کیفیت لوړول دي.
