د حضوري چمن د ملکیت برخلیک او ترې د سالمې ګټې اخیستنې په موخه ناسته وشوه
۱۴۴۶/۰۸/۰۲
د کور او ښار جوړولو وزارت محترم سرپرست وزیر الحاج شیخ حمدالله نعماني په مشرۍ په دغه وزارت کې، د اطلاعات او فرهنګ محترم وزارت، د ملي المپیک محترم عمومي ریاست، د عملیاتي محترمې ادارې او د کابل محترمې ښاروالۍ په غړیتوب ناسته وشوه.
دغه ناسته د عالیقدر امیرالمؤمنین حفظه الله د حکم د تطبیق او د محترمې کابینې د تصمیم پر اساس جوړه شوه چې، په کې د حضوري چمن د ملکیت برخلیک معلومولو او ترې د سالمې ګټې اخیستنې په پار د منظمې طرح پر جوړولو او پلي کولو بحث وشو.
ښاغلي شیخ حمدالله نعماني او ورسره د کمېټې غړو یې په ناسته کې، د ملي المپیک محترم عمومي ریاست له لوري جوړه شوې دري بُعدي (تري ډي) ویډیو وکتله، اسناد یې وکتل او دلایل او وړاندیزونه یې واورېدل.
یادونه وشوه چې، باید داسې طرحه جوړه شي چېو له مخې یې په حضوري چمن کې د تکړښت، تاریخي ارزښت، فرهنګي ارزښت، عایداتي ارزښت، عبادت او نورې ټولګټې چارې په پام کې ونیول شي.
د غونډې ګډونوالو هر یو خپل نظر وړاندې کړ او تصمیم ونیول شو چې، په دوهمه ناسته کې هغه چې په روانه اوونۍ کې به ترسره شي، د ملکیت او ترې د سالمې ګټې اخیستنې په پار منظمه او غني طرحه جوړه، دلایل او اسناد وړاندې او په ټوله کې د کمېټې وروستۍ خبره غوټه او د عالیقدر امیرالمؤمنین حفظه الله مقام ته د وروستي تصمیم نیولو په موخه وړاندې کړي.
د کور او ښار جوړولو وزارت محترم مشرتابه هڅې کوي چې، د حضوري چمن په تړاو د عالیقدر امیرالمؤمنین حفظه الله حکم له کوم ځنډ او خنډ پرته په سمه توګه تطبیق، ملکیت معلوم او ترې سالمه ګټه پورته شي.
