د حضرت حکیم سنایي او سلطان محمود کبیر ښارګوټو د ستونزو پر حل خبرې وشوې
۱۴۴۶/۰۱/۰۱
غزني ولایت کې د کور او ښار جوړولو ریاست محترم رئیس مولوي نور ولي بلال متقي په خپل کاري دفتر کې د (حضرت حکیم سنایي) او (سلطان محمود کبیر) خصوصي ښارګوټو له مالکینو سره وکتل.
دواړو لوریو په یادو ښارګوټو کې د شته ستونزو پر حل خبرې وکړې، چې څنګه کېدای شي د ښارګوټو پاتې چارې پیل شي.
ناسته کې چې د انجنیرۍ عمومي مدیریت او د تخنیکي ښار پلانونو عمومي مدیریت استازو هم ګډون درلود، په یادو ښارګوټو کې شته ستونزې په ګوته، د حل پر لارو چارو او د معیاري ښارګوټو په رامنځته کولو خبرې وشوې.
غزني کې عامو خلکو پر یادو ښارګوتو ادعا کړې چې ګواکې د دوی ځمکې یې په خپل سر نیولي او دوی ته یې بیه یا بدیل نه دی ورکړی.
د معلوماتو له مخې، دمګړۍ د یادو ښارګوټو دوسیه په غزني ولایت کې د عدلیې محترم ریاست ته سپارل شوې، تر څو یې په تړاو پرېکړه وشي او هر لوري ته خپل حق ورسېږي.
غزني کې د کور او ښار جوړولو محترم رئیس مولوي نور ولي بلال متقي وایي، تر هغې چې عدلي او قضایي ارګانونو د یادو ښارګوتو د حقوقي ستونزو د حل پرېکړه نه وي کړې، د نورو ودانیزو او رغنیزو چارو اجازه نه ورکوي.
ښاغلی مولوي بلال متقي وایي، د یادو ښارګوټو ستونزې به په بشپړه توګه د کور او ښار جوړولو وزارت محترم مقام سره شریکې کړي او د راتلونکو اقداماتو او حل لارو په برخه کې به یې هدایت ترلاسه او عملي کړي.
د کور او ښار جوړولو وزارت هڅې کوي چې د هېواد په کچه داسې ښارګوټي رامنځته شي، چې هېڅ نوع ستونزې ونه لري او د پانګوالو او پېرودونکو لپاره ګټور ثابت شي.
