د بېرته راستنېدونکو کډوالو لپاره د ځمکو د وېش او دایمي اوسېدو کمېټې خپل کاري لارښود جوړ کړ
۱۴۴۵/۰۴/۱۵
د کور او ښار جوړولو وزارت محترم سرپرست وزیر شیخ حمدالله نعماني په مشرۍ د بېرته راستنېدونکو کډوالو لپاره د خمکو د وېش او دایمي اوسېدو کمېټې ناسته وکړه، چې خپل کاري لارښوود یې چمتو کړ.
یاد لارښوود، د بېرته راستنېدونکو کډوالو د ستونزو د حل کمېسیون د طرزالعمل د اتم څپرکي د ۲۹ مې مادې د «و» بند د تحقق په موخه جوړ شو، چې له مخې به یې کمېټه خپلې چارې تنظیموي.
د ښارګوټو لپاره د ځمکو تشخیص، د ځمکو تصفیه، پلان جوړول، د دایمي مسکن جوړول، د مهاجرینو تثبیت او د مسکن د وېش څرنګوالی ټول هغه موضوعات وو، چې د دغه لارښوود د جوړولو په مهال پرې هر اړخیز بحث وشو.
دغه کمېټه د کور او ښار جوړولو وزارت محترم سرپرست وزیر شیخ حمدالله نعماني په مشرۍ او د کرنې او مالدارۍ وزارت، مهاجرینو او بېرته راستنېدونکو چارو وزارت، اوبو او انرژۍ وزارت، کلیو بیارغونې او پراختیا وزارت، اوبو رسولو شرکت، د چاپېریال ساتنې اداره او د ښاروالیو عمومي ریاست په غړیتوب جوړه شوې ده، چې فعال خوځښت یې پیل کړی دی.
