د بودیجې په لګښت کې دې له فساد مخنیوی وشي او حساب ورکول دې رامنځته شي
۱۴۴۳/۰۸/۲۶
د ښار جوړولو او ځمکو وزارت مالي او اداري مرستیال محترم حافظ محمد امین فاروقي په خپل کاري دفتر کې د دغه وزارت د مالي ریاست له مسؤلینو سره وکتل.
په دغه کتنه کې د عادي بودیجې د لګښت د څرنګوالي او د یاد ریاست د نورو فعالیتونو په اړه خبرې وشوې.
د مالي ریاست مسؤلینو د دغه ریاست د تشکیلاتو ، دندو ، مسؤلیتونو ، کړنو او د عادي بودیجې د لګښت د څرنګوالي په اړه ښاغلي حافظ محمد امین فاروقي ته بشپړ معلومات ورکړل.
دوی یادونه وکړه چې تر اوسه د عادي بودیجې د لګښت برخه کې له کومې ستونزې او ننګونې سره نه دي مخامخ شوي او چارې یې په نورماله توګه پر مخ روانې دي.
د ښار جوړولو او ځمکو وزارت مالي او اداري مرستیال د یاد ریاست اړوندو برخو کې لازمې لارښوونې وکړې چې څنګه کولی شي خپلې چارې لا منظمې او شفافې پر مخ یوسي او ټینګار یې وکړ چې د بودیجې په لګښت کې دې بشپړ شفافیت رامنځته او دغه برخه کې دې د حساب ورکولو لړۍ دوامداره شي.
نوموړي سپارښتنه وکړه چې د یاد ریاست کارکوونکي دې خپل مسؤلیت او ورسپارل شوې دنده په سمه توګه پر مخ یوسي، د خلکو په چارو کې دې ځنډ او خنډ نه رامنځته کوي او د نن کار دې سبا ته نه پرېږدي.
