د الشیخ ښارګوټي د حقوقي او اداري اسنادو د ارزونې په تړاو د ټاکلې کمېټې ناسته ترسره شوه
۱۴۴۷/۰۹/۱۴
د کور او ښار جوړولو وزارت د رهبرۍ د لارښوونې پر بنسټ، د وزارت د محترم مالي او اداري مرستیال مولوي محمد رباني ناصح په مشرۍ ټاکلې کمېټې په نوي کابل ښار کې د الشیخ ښارګوټي د سوانحو او سوابقو په تړاو ځانګړې ناسته ترسره کړه.
یاده ناسته چې د وزارت د محترم وزیر الحاج مولوي نجیب الله حیات حقاني د هدایت له مخې جوړه شوې وه، په کې د الشیخ ښارګوټي اړوند حقوقي، اداري او تخنیکي موضوعات په هر اړخیز ډول وڅېړل شول.
د غونډې په ترڅ کې د ښارګوټي د اسنادو تحلیل، د حقوقي مسایلو ارزونه، د اسنادو د تصفیې بهیر او همدارنګه د نوو نمرو د وېش په طرزالعمل بشپړ بحث ترسره او نظرونه تبادله شول.
ښاغلي مالي او اداري مرستیال مولوي محمد رباني ناصح ټینګار وکړ، چې ټول اسناد باید د نافذه قوانینو او اصولو له مخې په دقت وارزول شي، څو د هر ډول احتمالي ستونزو مخنیوی وشي او راتلونکی بهیر په شفاف، منظم او قانونمند ډول پرمخ ولاړ شي.
دغه راز نوموړي وویل، د نوو نمرو د وېش لپاره دې یو روښانه او عادلانه میکانېزم ترتیب شي، تر څو د مستحقینو حقوق خوندي او د ښاري پراختیا بهیر له خنډ پرته تطبیق شي.
د غونډې په پای کې د وزارت محترم مالي او اداري مرستیال یادې کمېټې ته دنده وسپارله چې د نوو نمرو د وېش، د اسنادو د تصفیې او حقوقي وضعیت د روښانتیا په تړاو طرزالعمل ترتیب کړي او د وروستۍ پرېکړې لپاره یې د وزارت محترم مقام ته وسپاري.
د یادونې وړ ده، چې الشیخ ښارګوټی د نوي کابل ښار له مهمو پراختیايي سیمو څخه شمېرل کېږي او د دې ښارګوټي د اسنادو منظمول، حقوقي وضاحت او د نمرو د وېش شفافیت د ښاري مدیریت، قانونمندۍ او متوازن انکشافي بهیر د تأمین په برخه کې مهم ارزښت لري.
