د ارزاقو امارتي شرکت د عمومي مدیریت د اداري ودانۍ د جوړولو له چارو څارنه ترسره شوه
۱۴۴۷/۱۱/۰۳
د سرپل ولایت د کور او ښار جوړولو ریاست د تخنیکي ټیم له لوري، د ارزاقو امارتي شرکت د عمومي مدیریت د اداري ودانۍ د جوړولو له روانو چارو څخه ساحوي تخنیکي څارنه ترسره شوه.
د څارنې پر مهال څرګنده شوه، چې د ودانۍ د دېوالونو د خشتکارۍ چارې بشپړې شوې دي او د ستنو د سیخ تړلو چارې هم تر ډېره حده بشپړې شوې دي. تخنیکي ټیم د کار کیفیت له نږدې وڅاره او د پروژې د لا ښه پرمختګ لپاره یې قراردادي شرکت ته لازمې تخنیکي لارښوونې وکړې.
د تخنیکي سپارښتنو له مخې، ټینګار وشو چې د دېوالونو د خشتکارۍ پر مهال دې د اوبو ورکولو پروسې ته ځانګړې پاملرنه وشي، د ستنو د ګژدمکونو ترمنځ واټن دې د منظور شوې نقشې سره سم برابر وساتل شي، او د ستنو د قالب تړلو په وخت کې دې قالبونه په سمه توګه تراز او شاول کړل شي.
د ودانیزو پروژو دوامداره تخنیکي څارنه د کار د کیفیت د لوړولو، د تخنیکي معیارونو د رعایت او د پروژو د معیاري تطبیق د تأمین لپاره مهمه بلل کېږي.
