د اجباري راستنېدونکو کډوالو لپاره د ښارګوټو جوړولو چارو پر چټکتیا ټینګار وشو
۱۴۴۶/۱۰/۱۷
د کور او ښار جوړولو وزارت محترم سرپرست وزیر الحاج شیخ حمدالله نعماني د مهاجرینو لپاره د ښارګوټو جوړولو عملیاتي چارو کمېټې سره وکتل.
لومړی، د کمېټې مشر محترم حافظ انجنیر محمد یوسف لطیف د ترسره شوو چارو او تر لاس لاندې چارو په تړاو بشپړ معلومات وړاندې کړل او د ځینو نورو چارو د ترسره کېدو په موخه یې د همکارۍ او لارښوونې غوښتنه وکړه.
ورپسې، د کور او ښار جوړولو وزارت محترم سرپرست وزیر الحاج شیخ حمدالله نعماني، د اجباري راستنېدونکو کډوالو لپاره د ښارګوټو جوړولو په چارو کې پر زیاتې چټکتیا او زمینې برابرولو ټینګار وکړ.
ښاغلي سرپرست وزیر وویل، په ولایتونو کې د کور او ښار جوړولو ریاستونو له شته ظرفیتونو دې هم ګټه واخیستل شي او په هممهاله توګه دې څو ځایه چارې روانې شي.
په دغه ناسته کې یو شمېر هغه ولایتونه هم په ګوته شول چې ځمکې یې تشخیص، د انتقال پروسه یې ترسره شوې، سروې یې ترتیب او پلان یې جوړ شوی او بالاخره په تمامه معنا وېش ته چمتو دي.
عملیاتي کمېټې ژمنه وکړه، چې چارو ته به نوره چټکتیا هم ورکوي، ټیمونه به استوي او له هرې ممکنه لارې به کار واخلي، ترڅو کډوالو ته اسانتیاوې برابرې شي.
د کور او ښار جوړولو وزارت ژمن دی چې په کم وخت او شته امکاناتو ډېرې چارې ترسره کړي او هېوادوالو ته د دایمي مېشتېدو زمینې برابرې کړي.
