کاپيسا کې د کاسا زر پروژې د تطبيق لپاره له ديرشو د زياتو برېښنايي پايو د نصب ځايونو د مالکيت حق تثبيت وشو
ښار جوړولو او ځمکو وزارت په تازه ډول په کاپيسا ولايت کې د کاسا زر پروژې د برېښنايي پايو لپاره د ۳۸ نصب ځايونو د مالکيت حق تثبيت کړ.
له دې ډلې څخه ۲۴ پايې په دولتي او ۱۴ پايې په شخصي ځمکو کې لګيږي چې د کاپيسا ولايت په پفدم، سنجن، ګراو موري او بولغين قريو کې موقعيت لري.
کاسا زر د وارداتي برېښنا له پروژو څخه ده چې د مالکيت حق د تثبيت او د بيې اېښودنې مسووليت يې د برېښنا رياست په همکارۍ ښار جوړولو او ځمکو وزارت ته سپارل شوی.
د کاسا زر پروژه د نړيوال بانک په مالي مرسته د قرغزستان او تاجکستان څخه ۱۳۰۰ ميګاواټه برېښنا؛ افغانستان او پاکستان ته لېږدوي. له دې ډلې څخه به ۳۰۰ ميګاواټه برېښنا ميدان وردګ، غزني، زابل، لوګر او ګرديز ښار ته وغځيږي او ۱۰۰۰ ميګاواټه نوره به يې پاکستان ته انتقال شي.
