د میدان وردګ ولایت د ترانسپورټي ترمینل تفصیلي پلان لاسلیک شو
۱۴۴۸/۵/۱
د کور او ښار جوړولو وزارت محترم وزیر الحاج مولوي نجیبالله حیات حقاني د میدان وردګ ولایت د ترانسپورټي ترمینل تفصیلي پلان لاسلیک کړ.
دغه ترمینل پر ۳۸ جریبه ځمکه طرحه شوی او د ښاري معیارونو او ترانسپورټي اړتیاوو له مخې بېلابېلې خدماتي، اداري او سوداګریزې برخې پکې په پام کې نیول شوې دي.
د یاد پلان له مخې، په ترمینل کې د ۱۷۰ ټکسیو او ۱۲۸ ملي بسونو لپاره د تمځایونو ترڅنګ، د مسافرو د انتظار خونه، د مسافرو د ښکته کولو ځانګړې ساحه، د ترمینل د ننوتلو او وتلو دروازې او د ټکسیو او ملي بسونو د تلاشي او کنټرول برخې په پام کې نیول شوې دي.
همدارنګه، د اوبو ذخیرې او برېښنا برج، د ترمینل د ساتونکو او موټرچلوونکو خونې، اداري ودانۍ، د تېلو ټانک، د موټرو ورکشاپ او د موټرو د مینځلو ساحه هم د دغه پلان مهمې برخې دي. په پلان کې د راتلونکو اړتیاوو لپاره ځانګړې شوې ساحه او د هغې اړوند ودانۍ هم شاملې دي.
د ترمینل په سوداګریزه او خدماتي برخه کې د یوه څلورپوړیز تعمیر جوړول هم په پام کې نیول شوي، چې د مسافر مېشتون، رستورانت او سوداګریزو هټیو لپاره به ترې ګټه واخیستل شي.
د دغه ترمینل د تفصیلي پلان په ترتیب سره به د مسافر وړونکو وسایطو د تګ راتګ، تم کېدو او کنټرول لپاره منظم چاپېریال برابر شي او مسافر به په یوه ځای کې ترانسپورتي، سوداګریزو او خدماتي اسانتیاوو ته لاسرسی ولري.
دغه راز، د ترمینل د بېلابېلو برخو منظم تنظیم به د سیمې د ترانسپورتي فعالیتونو په ښه مدیریت کې مرسته وکړي.
