د نوي کابل ښار د لا چټکې او معیاري پراختیا لپاره د کور او ښار جوړولو وزارت یو بل مهم او اغېزمن ګام هم اوچت کړ
۱۴۴۸/۱/۲۷
د کور او ښار جوړولو وزارت د محترم وزیر الحاج مولوي نجیب الله حیات حقاني له لوري، د نوي کابل ښار د لومړي پړاو په (۸/۲) پارسل سیمه کې د خاور ودانیز شرکت اړوند تفصیلي پلان، تر هر اړخیزې او دقیقې تخنیکي او مسلکي ارزونې وروسته، تأیید شو.
یاد تفصیلي پلان، د کور او ښار جوړولو وزارت د اړوندو مسلکي او تخنیکي برخو له لوري د نوي کابل ښار د منظور شویو پلانونو، ښاري اصولو، تخنیکي معیارونو او د سیمې د راتلونکو اړتیاوو په پام کې نیولو سره په دقت ارزول شوی، چې د ارزونې د بهیر تر بشپړېدو وروسته د وزارت د محترم مقام د تأیید وړ وګرځېد.
د دغه تفصیلي پلان تأیید، د نوي کابل ښار د لومړي پړاو د پراختیايي چارو د تنظیم او عملي کېدو په برخه کې یو مهم ګام بلل کېږي.
د پلان له تأیید سره به په یاده سیمه کې د پلان شویو ښاري او ودانیزو چارو د منظم تطبیق لپاره زمینه برابره او چارې به د منظور شوي تفصیلي پلان له مخې پرمخ یووړل شي.
د کور او ښار جوړولو وزارت محترم وزیر الحاج مولوي نجیب الله حیات حقاني، د نوي کابل ښار د پراختیايي چارو پر معیاري، منظم او اصولي تطبیق ټینګار لري او هڅه کوي، چې په دغه ښار کې ټولې ښاري او ودانیزې چارې د منظور شویو پلانونو او نافذه تخنیکي معیارونو په رڼا کې ترسره شي.
نوی کابل ښار د هېواد له مهمو او لویو ښاري پراختیايي پروژو څخه دی، چې د کابل ښار د نفوسو د زیاتوالي، د استوګنې اړتیاوو او د پلازمېنې د انډولیزې او منظمې پراختیا په پام کې نیولو سره طرحه شوی دی.
