د کونړ زلزلهځپلو لپاره د ۱۵۱۱ نمرې لرونکي ښارګوټي تفصیلي پلان منظور شو
۱۴۴۷/۱۲/۷
د کور او ښار جوړولو وزارت محترم وزیر، الحاج مولوي نجیب الله حیات حقاني، د کونړ ولایت زلزلهځپلو لپاره د ځانګړي ښارګوټي تفصیلي پلان تائید او لاسلیک کړ.
دغه پلان د ښاغلي وزیر حقاني صاحب له لوري په خپل کاري دفتر کې له تخنیکي ارزونې وروسته منظور شو، چې موخه یې د زلزلهځپلو کورنیو لپاره د معیاري او دایمي استوګنې زمینه برابرول دي.
یاد ښارګوټی د ننګرهار ولایت د ګمبیري په سیمه کې په ۱۰۰۰ جریبه ځمکه کې ډیزاین شوی، چې ټولې ۱۵۱۱ استوګنیزې نمرې په کې په پام کې نیول شوې دي.
په دغه تفصیلي پلان کې د ښاري اصولو او معیاري انجینري معیارونو له مخې جوماتونه، شنې ساحې، پارکونه، ښوونځی، د عامه خدماتو ساحې، داخلي سړکونه او نور اړین تأسیسات هم شامل شوي، څو د اوسېدونکو لپاره مناسب او هوسا چاپېریال رامنځته شي.
د کور او ښار جوړولو وزارت محترم وزیر الحاج مولوي نجیب الله حیات حقاني وایي، د دغه ښارګوټي تطبیق به د زلزلهځپلو کورنیو د ژوند د بېرته عادي کېدو، منظمې ښاري پراختیا او د معیاري استوګنځایونو د رامنځته کېدو په برخه کې مهم رول ولوبوي.
د کور او ښار جوړولو وزارت ژمن دی، چې د امارت د مشرتابه د حکم سره سم د طبیعي پېښو له امله زیانمنو شوو کورنیو ته د سرپناه، بنسټیزو خدماتو او خوندي ژوند د برابرولو لپاره ورته پراختیایي پروژې لا پراخې او ګړندۍ کړي.
