په میدان وردګ کې د مهاجرینو ښارګوټي د سړکونو د هوارولو چارې پیل شوې
۱۴۴۷/۱۱/۲۲
د میدان ښار اړوند د ده پاک مهاجرینو ښارګوټي د سړکونو د هوارولو چارې د میدان وردګ ولایت مقام او د کور او ښار جوړونې ریاست، ښاروالۍ، ټولګټو ریاست، مهاجرینو او اړوندو امنیتي ادارو په همغږۍ په رسمي ډول پیل شوې.
یاده پروژه د مهاجرینو لپاره د اساسي زیربناوو د برابرولو او د ښاري اسانتیاوو د رامنځته کولو په موخه عملي کېږي، څو د ښارګوټي د راتلونکو پرمختیایي چارو لپاره مناسب شرایط برابر شي.
د معلوماتو له مخې، په ده پاک مهاجرینو ښارګوټي کې ټولې ۱۲۲۸ استوګنیزو نمرو لپاره ځمکه ځانګړې شوې ده، چې د سړکونو د هوارولو له بشپړېدو وروسته به د خط اچونې او د استوګنیزو نمرو د وېش بهیر هم پیل شي.
د مهاجرینو ښارګوټو د بنسټیزو چارو پلي کېدل د راستنېدونکو کورنیو د دایمي مېشتېدو، د خدماتو د لاسرسي او د منظم ښاري چاپېریال د رامنځته کولو لپاره مهم ګام بلل کېږي.
