د هرات ښار د ماسترپلان د بیاکتنې او ښاري پراختیا په تړاو ناسته ترسره شوه
۱۴۴۷/۱۰/۱۴
د کور او ښار جوړولو وزارت د ښاري چارو محترم معین، شیخ مدارعلي کریمي بامیاني، په خپل کاري دفتر کې د هرات ولایت له محترم والي شیخ نور احمد اسلام جار سره لیدنه وکړه.
په دې لیدنه کې، د هرات ښار د ماسترپلان د بیاکتنې، د ښار د پنځلسو ناحیو د اصلاحي پلانونو او همدارنګه د تورغونډۍ او اسلام قلعه بندرونو د پراختیایي پلانونو په اړه هر اړخیزې خبرې وشوې، چې دواړو لورو د یادو پروژو د اهمیت په اړه نظرونه تبادله کړل او د ښاري پراختیا پر بهیر یې ټینګار وکړ.
همدارنګه، د تاریخي او فرهنګي اثارو د ساتنې او ارزښت په اړه هم بحث وشو، او ټینګار وشو چې د ښاري پراختیا تر څنګ باید د هېواد تاریخي میراثونه هم خوندي وساتل شي.
د کور او ښار جوړولو وزارت د ښاري چارو محترم معین ژمنه وکړه، چې د هرات ښار د ماسترپلان د بیاکتنې بهیر به چټک کړي او له اداري او تخنیکي مراحلو او منظورۍ وروسته به یې د عملي تطبیق لپاره هرات ولایت ته واستوي.
د هرات ښار د هېواد له مهمو اقتصادي او ترانزیټي مرکزونو څخه شمېرل کېږي، چې د تورغونډۍ او اسلامقلعه بندرونو له لارې له نړیوالو بازارونو سره نښلونکی دی، د ښار د چټک نفوس زیاتوالي او ښاري پراختیا اړتیاوو ته په کتو، د ماسترپلان بیاکتنه او د ښاري پلانونو اصلاح د منظمې پراختیا او بنسټیزو خدمتونو د ښه کېدو لپاره مهمه ګڼل کېږي.
