د کابل په ۱۷مه ناحیه کې د صنعتي فعالیتونو د قانوني وضعیت ارزونه وشوه
۱۴۴۷/۹/۲۵
له ښاري تخلفاتو د مخنیوي محترم ریاست اړوند تخنیکي ټیم له لوري، د کابل ۱۷ مې ناحیې اړوند د صنعتي فعالیتونو د قانوني وضعیت او څرنګوالي په اړه ساحې ته سفر او ارزونه وکړه.
دغه ارزونه د کور او ښار جوړولو وزارت اړوند له ښاري سرغړونو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
له یادې ارزونې موخه دا وه، چې د هغو تولیدي شرکتونو او فابریکو څارنه، ارزونه او پېژندنه وکړي، کوم چې د کابل – شمال سړک په شاوخوا سیمو کې په خپلسرې توګه او له منظم ښاري پلان پرته فعالیتونه کوي.
دغو فابریکو کې د سړو خونو او کارتن جوړولو فابریکه، د اسیا نور د درملو تولیدي شرکت، د مانا جوس تولیدي شرکت او یو شمېر نور صنعتي فعالیتونه شامل دي.
دا نظارت د دې لپاره ترسره شو چې په یادو سیمو کې د غیرقانوني صنعتي فعالیتونو د پراخېدو مخنیوی وشي، او باید صنعتي فابریکې او تولیدي فعالیتونه یوازې په ټاکل شوو صنعتي ښارګوټو کې ترسره شي.
د نظارت په مهال د یادو فابریکو د فعالیت ځایونه او د فعالیت ډولونه تثبیت شول او په اړه یې لومړني معلومات راټول شول.
همدارنګه له مالکینو یې غوښتنه وشوه چې د خپلو فعالیتونو اړوند اسناد او جوازونه وړاندې کړي، څو تر بشپړې ارزونې وروسته د ښاري نافذه قوانینو له مخې لازم تصمیم ونیول شي.
