په زابل ولایت کې بېرته راستنو شوو مهاجرینو ته د استوګنې نمرې ووېشل شوې
۱۴۴۷/۰۹/۲۳
د کور او ښار جوړولو وزارت په مشرۍ د دایمي مېشتېدنې کمېټې له لوري د زابل ولایت په اړوندو سیمو کې بېرته راستنو شوو مهاجرینو ته د استوګنې نمرې ووېشل شوې.
د یادې کمېټې د پرېکړې له مخې، د مهاجرینو د دایمي مېشتېدو او د مناسب استوګنځای د برابرولو په موخه ټولټال ۳۳۹ د استوګنې نمرې مستحقو کورنیو ته ووېشل شوې، څو یادې کورنۍ وکولای شي په ټاکل شویو سیمو کې دایمي استوګنه وکړي.
د کور او ښار جوړولو وزارت ټینګار کوي چې د بېرته راستنېدونکو مهاجرینو د مېشتېدو بهیر به د استوګنې د نمراتو د وېش له لارې د ټاکل شوو اصولو او طرزالعملونو سره سم دوام ولري.
د دایمي مېشتېدنې کمېټه د کور او ښار جوړولو وزارت په مشرۍ او د اړوندو ادارو په همغږۍ فعالیت کوي، چې موخه یې بېرته راستنېدونکو مهاجرینو ته د استوګنې مناسب شرایط برابرول او د هغوی د دایمي مېشتېدو بهیر منظمول دي.
