په غزني ولایت کې د صنعتي پارک د مهمې پروژې د طرحې او ډیزاین چارې بشپړې او منظور شوې
۴۷/۹/۲۱
د کور او ښار جوړولو وزارت، محترم وزیر الحاج مولوي نجیب الله حیات حقاني په خپل کاري دفتر کې، د غزني ولایت د اسفنده د سپکو صنايعو صنعتي پارک اړوند تفصیلي پلان منظور کړ.
دغه پلان د کور او ښار جوړولو وزارت او د صنعت او سوداګرۍ وزارت ترمنځ د موجود هوکړه لیک له مخې، د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ د عملیاتي پلانونو د کمېټې له لوري و ارزول شو او بیا تر کنترول وروسته دا پلان د یاد وزارت د محترم وزیر الحاج مولوي نجیب الله حیات حقاني له لوري په رسمي ډول تائيد شو.
د دغې پروژې په چوکاټ کې یو لړ تخنیکي چارې ترسره شوې دي چې په کې د امکان سنجۍ مطالعې، تخصصي ارزونې، توپوګرافي سروې، هایدرولوژیکي او جیوتخنیکي مطالعې هم شاملې دي چې پر بنسټ یې د صنعتي پارک تفصیلي پلان برابر شو.
د غزني ولایت د اسفنده د سپکو صنايعو صنعتي پارک په شاوخوا (۱۱۰۰) جریبه ځمکه کې ډیزاین شوی، چې په کې (۲۳۹) د فابریکو نمرې په پام کې نیول شوې دي.
د دغه پارک شاوخوا ۵۲ سلنه ساحه د صنعتي فعالیتونو لپاره ځانګړې شوې ده.
ټاکل شوې چې په دې صنعتي پارک کې د سپکو صنايعو بېلابېل سکتورونه فعالیت وکړي، چې په کې د وچو مېوو پروسس، د خوراکي توکو تولید، درمل جوړول او روغتیايي توکي، غیر الکولي څښاک، فرنیچر او نساجي، پلاستیکي توکي، برېښنایي وسایل او نورې سپکې صنعتي برخې شاملې دي.
دا پروژه به د صنعت د پراختیا ترڅنګ د پانګونې د زیاتوالي او د کاري فرصتونو د رامنځته کېدو لپاره مهم ګام وبلل شي.
