د اسلامي فقهې د اصولو پر بنسټ د ښار جوړولو او مسکن قانون د هېواد بېړنۍ اړتیا ده
۱۴۴۷/۷/۲۴
د کور او ښار جوړولو وزارت د تقنیني اسنادو د بیاکتنې او طی مراحل د کمېټې ناسته، د دې وزارت د ښاري چارو د محترم مرستیال شیخ مدارعلي کریمي بامیاني په مشرۍ ترسره شوه.
په پیل کې د کور او ښار جوړولو وزارت د پلان او پالیسۍ ریاست د ناستې د اجنډا او د بحث وړ موضوعاتو په اړه معلومات وړاندې کړل او د عالیقدر امیرالمؤمنین حفظهالله د صادر شوي فرمان پر بنسټ یې د ښار جوړولو او مسکن قانون د مسودې د فقهي تخریج پر اړتیا ټینګار وکړ.
له دې وروسته د ناستې ګډونوالو د موضوع په اړه خپل نظرونه او وړاندیزونه وړاندې کړل او د داسې نوي ښار جوړولو او مسکن قانون پر اړتیا یې بحث وکړ، چې په کې اسلامي فقه په بشپړ ډول مراعات شوې وي.
په دې ناسته کې د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني، د ښار جوړولو او مسکن هغه قانون چې د اسلامي فقهي د اصولو پر بنسټ تخریج شوی وي، ډېر مهم وباله او زیاته یې کړه، چې اړینه ده دغه قانون له اسلامي فقهې سره سم ترتیب شي.
همداراز په ناسته کې ټینګار وشو، چې د ښار جوړولو او مسکن قانون د فقهي تخریج لپاره لازمه ده د دیني علماوو ځانګړې کمېټه جوړه شي، تر څو په دې برخه کې خپلې چارې پر مخ یوسي.
په پای کې پرېکړه وشوه، چې د دې وزارت د دعوت او ارشاد محترم رئیس په ګډون پنځه تنه دیني علما د کمېټې د غړو په توګه وټاکل شي او د پلان او پالیسۍ محترم رئیس او د داخلي تفتیش محترم رئیس د استازو او سلاکارانو په توګه په دې کمېټه کې دنده ترسره کړي.
