زابل ولایت کې د میرویس خان نیکه پوهنتون د اوبو ټانکۍ او تحقیقاتي فارم د چارو ساحوي ارزونه ترسره شوه
۱۴۴۷/۰۷/۱۴
د زابل ولایت د کور او ښار جوړولو ریاست تخنیکي ټیم د میرویس خان نیکه پوهنتون اړوند د اوبو ټانکۍ او تحقیقاتي فارم د ودانیزو چارو ساحوي لیدنه ترسره کړه.
په دې لیدنه کې د خشتکارۍ او کانکریټ اچونې روان کارونه له نږدې وڅارل شول. تخنیکي ټیم د کارونو کیفیت، د تطبیق بهیر، مهالوېش او د تخنیکي اصولو رعایت وارزاوه، چې پایله یې مثبته وبلل شوه.
همدارنګه، د ژمي د سړې هوا له امله، قراردادي شرکت ته لارښوونه وشوه چې د کانکریټ اچونې پر مهال د یخ ضد موادو څخه استفاده وکړي، تر څو د ساختماني کیفیت دوام او تخنیکي معیارونه خوندي پاتې شي.
د کور او ښار جوړولو ریاست د پراختیایي پروژو د ښه تطبیق، کیفیت کنټرول او د ملي زیربناوو د پیاوړتیا په موخه په دوامداره توګه د دولتي پروژو ساحوي څارنه کوي. د میرویس خان نیکه پوهنتون اړوند یادې پروژې د علمي څېړنو، کرنیزو پرمختګونو او د اوبو د معیاري مدیریت په برخه کې مهم رول لري.
د تخنیکي اصولو رعایت او پر وخت څارنه د دې لامل ګرځي چې پروژې د معیارونو سره سم او د اوږدمهاله ګټې لپاره بشپړې شي.
