بامیان ولایت کې د مهاجرینو په ښارګوټي کې یو شمېر کورونه جوړ شول
۱۴۴۷/۶/۲۴
بامیان ولایت کې د مهاجرینو ښارګوټی د ۱۴۴۷ هـ ق کال د ۴مې میاشتې په ۴مه نېټه په رسمي ډول د کور او ښار جوړولو وزارت د محترم وزیر الحاج مولوي نجیب الله حیات حقاني له لوري پرانیستل شو.
د پرانیستې له مراسمو وروسته، د ښارګوټي عملي کارونه په دغه ولایت کې د کور او ښار جوړولو ریاست تر څار لاندې په رسمي ډول پيل شول.
اوس مهال د کډوالو ښارګوټي د سړکونو د هوارولو چارې د بشپړېدو په حال کې دي.
دغه راز، د ۳۰ استوګنیزو نمرو خط اچونه ترسره شوې او مستحقو مهاجرو کورنیو ته د وېش لپاره چمتو شوې دي.
د همدې پروژې په چوکاټ کې د ۳۰ باب استوګنیزو کورونو (شلټرونو) د جوړولو چارې هم بشپړې شوې دي، چې د مستحقو کډوالو لپاره ځانګړې شوې دي.
د شلټر په بڼه د کورونو جوړولو دغه پروژه د «آرو» مؤسسې له خوا تطبیق شوې او د (یو، این، ایچ، سي، آر) ) دفتر له لوري تمویل شوې ده.
د معلوماتو له مخې، د یادې پروژې ټولیز لګښت ۱۲۶ زره (یوسل او شپږ ویشت زره) امریکایي ډالر دی، او د هر شلټر لګښت ۴۲۰۰ (څلور زره او دوه سوه) امریکایي ډالر ته رسېږي.
د یادونې وړ ده چې هر استوګنیز کور دوه د ناستې خونې، دهلیز، پخلنځی، حمام او تشناب لري.
د دې کورونو د جوړولو چارې په درې میاشتو کې بشپړې شوې دي، خو تر اوسه یې وروستۍ تسلیمي نه ده شوې او له بشپړې تسلیمۍ وروسته به پر راستانه شوو اړمنو مهاجرو کورنیو ووېشل شي.
همدارنګه، د ښارګوټي د پاتې استوګنیزو نمرو د خط اچونې چارې په عادي ډول روانې دي.
