د نیمروز ښار د پنځمې ناحیې د غیرقانوني ودانیو د مخنیوي لپاره تخنیکي څارنه ترسره شوه
۱۴۴۷/۰۵/۲۷
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، د نیمروز ولایت د کور او ښار جوړولو ریاست د محترم رئیس مولوي عبدالجبار یاسیني په لارښوونه، د دې ریاست اړوند تخنیکي ټیم د زرنج ښار د پنځمې ناحیې له ساحې څخه د ښاري تخلفاتـو د مخنیوي په موخه لیدنه او څارنه وکړه.
ښاغلي مولوي یاسیني وویل، د تخنیکي ټیم د څارنې پر مهال څرګنده شوه چې په یاده ساحه کې یو شمېر ودانیز کارونه روان دي، چې د ښاروالۍ لهخوا یې د کار جواز ترلاسه کړی، خو د نقشې او تخنیکي پلان نشتوالی د ښار جوړونې له اصولو سره په ټکر کې دی. له همدې امله، یاده ودانۍ د ښاري تخلف په توګه وپېژندل شوه.
د کور او ښار جوړولو ریاست ټینګار وکړ چې ټول ساختماني فعالیتونه باید د تصویب شوې نقشې، ښاري پلان او تخنیکي معیارونو له مخې ترسره شي، او له غیرقانوني ودانیو څخه باید جدي مخنیوی وشي، تر څو د ښار د ښکلا او نظم ساتنه یقیني شي.
د کور او ښار جوړولو وزارت د ښاري سرغړونو د مخنیوي په موخه ځانګړې څارونکې ډلې فعالې کړې دي، څو د ښارونو د منظم پرمختګ، د ودانیو د کیفیت، او د ښاري نظم د ټینګښت لپاره دوامداره څارنه ترسره کړي.
