په ارزګان ولایت کې د ښاري سرغړونو د مخنیوي په موخه د تخنیکي ټیم څارنه ترسره شوه
۱۴۴۷/۰۵/۱
د کور او ښار جوړولو وزارت د ښاري سرغړونو ریاست محترم رئیس مولوي عبدالمنان حقاني وایي، د ارزګان ولایت د کور او ښار جوړولو ریاست د رئیس محترم الحاج ملا روح الله (ابواحمد) په لارښوونه د دغه ریاست د تخلفاتي ټیم له لوري د ښاري سرغړونو د مخنیوي په موخه نظارت ترسره شو.
د ارزګان ولایت د کور او ښار جوړولو ریاست تخنیکي او تخلفاتي ټیم د مرکز ترینکوټ اړوند ټولو ناحیو څخه څارنه وکړه، تر څو د ښاري نظم د ساتنې او د غیرقانوني جوړښتونو د مخنیوي په برخه کې لازم ګامونه پورته کړي.
ښاغلي مولوي ابو احمد وویل، د نظارت پر مهال، د دریمې ناحیې اړوند د منار ترڅنګ د ښځو مارکېټ ته نږدې په یوه استوګنیزه نمره کې یو کس هڅه کوله چې تجارتي دوکانونه جوړ کړي. د تخلفاتي ټیم له لوري نوموړي ته سپارښتنه وشوه چې یاده ساحه د استوګنې لپاره ځانګړې شوې ده، نو باید یوازې د استوګنیز کور په توګه ترې ګټه واخیستل شي.
د نوموړي په خبره، د ټیم له لوري ښاریانو ته عامه پوهاوی ورکړل شو چې خپل تاسیسات د کور او ښار جوړولو وزارت د طرزالعمل او اصولو له مخې جوړ کړي، څو د ښار نظم، ښکلا او قانوني جوړښت خوندي پاتې شي.
د کور او ښار جوړولو وزارت د ښاري سرغړونو ریاست د هېواد په ټولو ولایتونو کې د ښاري نظم د ساتنې، د غیرقانوني ودانیو د مخنیوي او د ښاري اصولو د تطبیق مسوول دی.
