د کور او ښار جوړولو وزارت مالي او اداري مرستیال د نوي کابل ښار له ځینو برخو لیدنه وکړه
۱۴۴۷/۰۲/۱۱
د کور او ښار جوړولو وزارت محترم مالي او اداري مرستیال الحاج محمد ارسلاح خروټي د نوي کابل ښار د پرمختیايي چارو د ارزونې په لړ کې، د دې ښار د لومړۍ، دوهمې او ځینو برخو څخه لیدنه وکړه.
په یاده لیدنه کې چې د وزارت یو شمېر رئیسان او مسلکي انجنیران یې هم ملګري وو، تخنیکي ټیم د پام وړ ساحې مشخصې کړې او له نږدې یې تخنیکي ارزونه ترسره شوه.
ښاغلي مالي او اداري مرستیال څرګنده کړه، یاده پروژه د امارتي ادارو د تمرکز، اغېزمنې همغږۍ او ښاري نظم لپاره خورا مهمه ده، او په خبره یې ځینې ساحې یې د ادارو د فعالیتونو لپاره مناسبې ارزول شوې دي.
نوموړي ټینګار وکړ چې، د یادو ساحو د دقیق تنظیم، نقشې او تطبیق د چټک پیل لپاره به یو تخنیکي مجلس جوړ شي، څو اړینې پرېکړې وشي او چارې د ټاکلي مهال وېش سره سم پرمخ لاړې شي.
د یادونې وړ ده چې، دا لیدنه د کور او ښار جوړولو وزارت د ستراتېژیکو موخو په چوکاټ کې، د نوي کابل ښار د متوازن، منظم او عصري پراختیا په پار ترسره شوه.
